ວັນທີ 12 ພະຈິກ 2024 ນີ້, ສະຫາຍ ທອງສະລິດ ມັງໜໍ່ເມກ ຄະນະເລຂາທິການສູນກາງພັກ, ຫົວໜ້າຫ້ອງວ່າການສູນກາງພັກ ໄດ້ຕ້ອນຮັບສະຫາຍ ຫງວຽນ ມິງ ເຕິມ (Nguyễn Minh Tâm) ໃນໂອກາດທີ່ໄດ້ຮັບການແຕ່ງຕັ້ງເປັນ ເອກອັກຄະລັດຖະທູດວິສາມັນ ຜູ້ມີອໍານາດເຕັມ ແຫ່ງ ສສ ຫວຽດນາມ ປະຈໍາ ສປປ ລາວ ຄົນໃໝ່.
ສະຫາຍ ທອງສະລິດ ມັງໜໍ່ເມກ ໄດ້ສະແດງຄວາມຍິນດີ ຕ້ອນຮັບຢ່າງອົບອຸ່ນ, ພ້ອມທັງຕີລາຄາສູງຕໍ່ ສະຫາຍ ຫງວຽນ ມິງ ເຕິມ ທີ່ໄດ້ຮັບຄວາມເຊື່ອໝັ້ນ, ຄວາມໄວ້ເນື້ອເຊື່ອໃຈ ຈາກພັກ, ລັດ ກໍຄື ປະຊາຊົນຫວຽດນາມອ້າຍນ້ອງ ໃຫ້ມາປະຕິບັດໜ້າທີ່ເປັນທູດຢູ່ ສປປ ລາວ ເຊິ່ງເປັນຜູ້ສືບທອດພາລະກິດໜ້າທີ່ການທູດ, ກົນໄກປະສານງານ ໃຫ້ແກ່ການພົວພັນ ຮ່ວມມື ຂອງສອງປະເທດ ກໍຄື ຮັດແໜ້ນ ແລະ ເພີ່ມພູນຄູນສ້າງສາຍພົວພັນ ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ທີ່ປະທານໂຮ່ຈີ່ມິ່ງ, ປະທານ
ໄກສອນ ພົມວິຫານ ແລະ ປະທານສຸພານຸວົງ ເປັນຜູ້ກໍ່ຕັ້ງ ແລະ ໄດ້ຮັບການສືບທອດ
ໂດຍການນໍາ ປະຕິວັດຮຸ່ນຕໍ່ໆ ມາເຖິງປັດຈຸບັນ
ໃຫ້ນັບມື້ເຂົ້າສູ່ລວງເລິກຍິ່ງໆຂຶ້ນ.
ສະຫາຍ ຫງວຽນ ມິງ ເຕິມ ໄດ້ສະແດງຄວາມຂອບໃຈຕໍ່ ສະຫານ ທອງສະລິດ ມັງໜໍ່ເມກ ທີ່ໃຫ້ການຕ້ອນຮັບຢ່າງອົບອຸ່ນ,
ພ້ອມທັງແຈ້ງໃຫ້ຊາບໂດຍຫຍໍ້ ສະພາບການທີ່ພົ້ນເດັ່ນ ຂອງປະເທດຫວຽດນາມ ແລະ
ໄດ້ສະແດງຄວາມຢືນຢັນວ່າ ຈະສືບຕໍ່ຊຸກຍູ້ສົ່ງເສີມສາຍພົວພັນ
ມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ ໃຫ້ແໜ້ນແຟ້ນຍິ່ງຂຶ້ນ.
ຂ່າວ: ສົມຫວັງ
