![](https://blogger.googleusercontent.com/img/b/R29vZ2xl/AVvXsEiV6YVMHzWjPUhcxGFTHTo2A38k0ZzczU4CmxxX_YJJLp2UYymZJGPsUiKpnd3vBDbYgJgpAhu8Oq9geP4zr3g_y7YuCJzZhZQBsBKVM5c0N5ZbV_J8y2GF4BDbEbNIG-z-t5tDEtAV8l-8/s1600/template_bknews.png)
ສຳນັກຂ່າວຕ່າງປະເທດລາຍງານ 29 ຕຸລາ 2018 ວ່າ: ສຳນັກງານການບິນພົນລະເຮືອນແຫ່ງຊາດອິນໂດເນເຊຍ ອອກຖະແຫຼງການເລື່ອງຖ້ຽວບິນ JT 610 ຂອງສາຍການບິນ Lion Air ຍົນໂບອິ້ງ 737 ແມັກ 8 ອອກເດີນທາງຈາກສະໜາມບິນສາກົນຊູກາໂນ-ຮັດຕາ ນະຄອນຫຼວງຈາກາຕາ ເມື່ອເວລາປະມານ 06:20 ໂມງ ຕາມເວລາທ້ອງຖິ່ນ ພ້ອມຜູ້ໂດຍສານ 181 ຄົນ ແລະ ຈຸບິນ 7 ຄົນ ລວມທັງໝົດເປັນ 188 ຄົນ ມີປາຍທາງຄືສະໜາມບິນເດປາເຕຍ ເອມີ ໃນແຂວງບັງກາເບີລີຕຸງ ທາງພາກຕາເວັນອອກສຽງໃຕ້ຂອງເກາະສຸມາດຕຣາ ໂດຍມີກຳນົດການເດີນທາງປະມານ 1 ຊົ່ວໂມງ.
ເຖິງຢ່າງໃດກໍ່ຕາມ, ຍົນໄດ້ຂາດການຕິດຕໍ່ກັບຫໍບັງຄັບການບິນພຽງ 13 ນາທີພາຍຫຼັງອອກເດີນທາງ ແລະ ຕົກລົງນອກຝັ່ງເກາະຊວາ ເຊິ່ງໜ່ວຍກູ້ໄພກຳລັງອອກປະຕິບັດການ ໂດຍເຈົ້າໜ້າທີ່ຍັງປະຕິເສດໃຫ້ຂໍ້ມູນກ່ຽວກັບຊະຕາກຳຂອງຜູ້ໂດຍສານເທິງຍົນທັງໝົດ, ຂະນະທີ່ສື່ທ້ອງຖິ່ນຫຼາຍແຫ່ງລາຍງານວ່າ ຊິ້ນສ່ວນ ແລະ ອຸປະກອນຈາກຍົນໄດ້ເລີ່ມລອຍຂຶ້ນສູ່ຜິວນ້ຳ ເຊິ່ງລວມມີເບາະນັ່ງ, ກະເປົ໋າເດີນທາງຂອງຜູ້ໂດຍສານ ແລະ ແພຍາງຊູຊີບ.
![](https://www.idsala.com/wp-content/uploads/2018/10/DqpRAp7VAAU6vXQ.jpg)
![](https://www.idsala.com/wp-content/uploads/2018/10/DqpQ-6TUUAI4JM0.jpg)
![](https://www.idsala.com/wp-content/uploads/2018/10/DqpREs_U0AAXDzx.jpg)