ທ່ານ ເຈເຣມີ ດັກລາສ ຕົວແທນປະຈຳພາກພື້ນອາຊີຕາເວັນອອກສຽງໃຕ້ ແລະ ປາຊີຟິກ ຂອງສຳນັກງານປ້ອງກັນຢາເສບຕິດ ແລະ ປາບປາມອາຊະຍາກຳແຫ່ງ ສປຊ (UNODC) ກ່າວໃນກອງປະຊຸມຕຳຫລວດ ແລະ ເຈົ້າໜ້າທີ່ລະດັບພາກພື້ນ ທີ່ນະຄອນຫລວງເນປີດໍ ຂອງມຽນມາ ເລື່ອງກຳນົດຍຸດທະສາດໃໝ່ໃນການຕໍ່ສູ້ກັບໄພຢາເສບຕິດວ່າ: ຫລັກນິຕິລັດ ແລະ ທຳມາພິບານຄືປັດໄຈສຳຄັນໃນການຫລຸດການຜະລິດ ແລະ ການຄ້າຂາຍຢາເສບຕິດໃນໄລຍະຍາວ, ເວົ້າໃຫ້ງ່າຍໆຄືການແກ້ໄຂບັນຫາທຸຈະລິດ, ສະພາບແວດລ້ອມ ແລະ ສິ່ງເບາະບາງຕ່າງໆທີ່ເປີດຊ່ອງທາງໃຫ້ແກ້ງອາຊະຍາກຳແຜ່ຂະຫຍາຍການຜະລິດ ແລະ ຄ້າຂາຍຢາເສບຕິດ. ຂະນະດຽວກັນ ຕ້ອງແກ້ໄຂບັນຫາຟອກເງິນ, ເພີ່ມການແບ່ງປັນຂໍ້ມູນຂ່າວສານເລື່ອງແກ້ງຄ້າຢາ ແລະ ມີສູນບຳບັດລະດັບທ້ອງຖິ່ນໃຫ້ແກ່ຜູ້ເສບຕິດ ແລະ ຜູ້ຄ້າລາຍຍ່ອຍແທນການລົງໂທດຈຳຄຸກ.
UNODC ລະບຸວ່າ: ສາມຫລ່ຽມຄຳເປັນດິນແດນທີ່ຜະລິດຢາເສບຕິດຫລາຍເປັນອັນດັບສອງຂອງໂລກ, ແຫລ່ງຜະລິດໃຫຍ່ຢູ່ໃນລັດສານຂອງມຽນມາທີ່ເຕັມໄປດ້ວຍການສູ້ຮົບ. ແຫລ່ງຜະລິດເຫລົ່ານີ້ເຮັດວຽກທັງເວັນທັງຄືນ ເພື່ອໃຫ້ແກ້ງອາຊະຍາກຳຂະຫຍາຍຕະຫລາດອອກໄປນອກພາກພື້ນ ໂດຍໄປໄກເຖິງອົດສະຕຣາລີ ແລະ ຍີ່ປຸ່ນ, ຄາດວ່າແຕ່ລະປີມີຢາບ້າຈາກສາມຫລ່ຽມຄຳຜ່ານເຈົ້າໜ້າທີ່ທຸຈະລິດ ແລະ ດ່ານຊາຍແດນຕ່າງໆ ຄິດເປັນມູນຄ່າເຖິງ 40.000 ລ້ານໂດລາສະຫະລັດ, ປະລິມານຢາທີ່ເພີ່ມຂຶ້ນສົ່ງຜົນໃຫ້ລາຄາຫລຸດລົງ ໂດຍມີລາຄາຖືກທີ່ສຸດເມັດລະ 2 ໂດລາສະຫະລັດ ໃນລາວ ແລະ 7 ໂດລາສະຫະລັດ ໃນສິງກະໂປ.
