ວັນທີ 4 ກໍລະກົດ 2016 ຢູ່ທີ່ພະແນກອຸດສາຫະກຳ ແລະ ການຄ້າ ນະຄອນຫຼວງວຽງຈັນ (ອກ.ນວ) ຈັດກອງປະຊຸມເຜີຍແຜ່ວຽກງານ ການຄຸ້ມຄອງໂຮງງານອຸດສາຫະກຳປຸງແຕ່ງໄມ້ ແລະ ເຟີນີເຈີໂດຍການເປັນປະທານຂອງທ່ານ ເບີລິນ ເພັດຈັນທະລາດ ຫົວໜ້າພະແນກ ອກ.ນວ ເຊິ່ງມີບັນດາຜູ້ປະກອບການກ່ຽວກັບໄມ້ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ການເຜີຍແຜ່ປະກອບມີ ຄຳສັ່ງວ່າດ້ວຍການເພີ່ມທະວີຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້ເຄື່ອນຍ້າຍໄມ້ ແລະ ທຸລະກິດໄມ້ ແຈ້ງການວ່າດ້ວຍການຜັນຂະຫຍາຍ ແລະ ການຈັດຕັ້ງປະຕິບັດຄຳສັ່ງເລກທີ 15/ນຍ ຄຳສັ່ງແນະນຳຂອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ແຈ້ງການ ການຂຶ້ນບັນຊີໄມ້ທີ່ຄ້າງຄາ ແລະ ຜະລິດຕະພັນໄມ້ເຄິ່ງສຳເລັດຮູບພາຍໃນໂຮງງານ.
ເພື່ອເຮັດໃຫ້ການຄຸ້ມຄອງການຜະລິດ ແລະ ການດຳເນີນທຸລະກິດອຸດສາຫະກຳປຸງແຕ່ງໄມ້ມີປະສິດທິພາບ ແລະ ປະສິດທິຜົນສູງ ທັງມີຄວາມເປັນເອກະພາບໃນຂອບເຂດທົ່ວປະເທດ ແນໃສ່ໃຫ້ສອດຄ່ອງຕາມຄຳສັ່ງເລກທີ 15/ນຍ ກົມອຸດສາຫະກຳ ແລະ ຫັດຖະກຳ ກະຊວງອຸດສາຫະກຳ ແລະ ການຄ້າ ຈຶ່ງໄດ້ແຈ້ງການມາຍັງພະແນກອຸດສາຫະກຳ ແລະ ການຄ້າແຂວງ ນະຄອນຫຼວງ ຮັບຊາບ ແລະ ລົງເກັບກຳຂໍ້ມູນນຳໂຮງງານອຸດສາຫະກຳປຸງແຕ່ງໄມ້ຄື: ໃຫ້ຂຶ້ນບັນຊີໄມ້ທ່ອນທັງໝົດທີ່ມີຢູ່ໃນໂຮງງານໃນປັດຈຸບັນ ພ້ອມທັງໃຫ້ລະບຸຊະນິດພັນໄມ້ ແລະ ບໍລິມາດເພື່ອຕິດຕາມຂຶ້ນບັນຊີຜະລິດຕະພັນໄມ້ທັງໝົດ ທີ່ໄດ້ທຳການຜະລິດພາຍໃນໂຮງງານ.
ທັງນີ້ ກໍ່ເພື່ອເຮັດໃຫ້ການຈັດຕັ້ງປະຕິບັດວຽກງານຄຸ້ມຄອງປ່າໄມ້ ທຸລະກິດໄມ້ ການຂຸດຄົ້ນໄມ້ ປຸງແຕ່ງໄມ້ ແລະ ຊື້-ຂາຍໄມ້ ໃຫ້ມີຄວາມເຂັ້ມງວດຕາມກົດໝາຍ ແລະ ລະບຽບການຕ່າງໆ ທີ່ລັດຖະບານໄດ້ວາງອອກໃຫ້ມີຄວາມສັກສິດທັງເປັນການສະກັດກັ້ນ ຕ້ານ ແລະ ແກ້ໄຂປາກົດການຫຍໍ້ທໍ້ດ້ານຕ່າງໆ ໃນຂົງເຂດວຽກງານປ່າໄມ້ໃຫ້ຫຼຸດລົງ ແລະ ໝົດໄປເທື່ອລະກ້າວ.
ຂໍຂອບໃຈຂໍ້ມູນຈາກ: ໜັງສືພິມລາຍວັນ-ວຽຽຈັນໃໝ່
